1Ti 2 | KMG | STEP | No bâbâni dâŋ moc gaza qâmoc epe: Nunumu wâwâsic â daŋge mumuteŋ izi ŋaŋacne â ŋic gâcne sasawa dopec-jopahuc

1 Timothy 2

Nunumure dâŋ

1 No bâbâni dâŋ moc gaza qâmoc epe: Nunumu wâwâsic â daŋge mumuteŋ izi ŋaŋacne â ŋic gâcne sasawa dopec-jopahuc 2 ŋicwofuŋ â kia gawamaî mâmâc dopec-jopanšepieŋ. Eme soŋaŋ-nâpohapie wamao mâteŋne â mitine juhâmopene ŋiczi mana-nârepie fezejec. 3 Izi biaŋkeocmu, â bâbâpiaŋ-nâŋec Anutu e irec maname sâckeocmu. 4 Eki ŋic mâmâc sasawa biaŋkerâ dâŋ fâri qizecne mana maŋ eniŋte muekac hâcne. 5 Anutu mocjaha hâcne junârekac, erâ Anutu â ŋic ŋondeŋ-nâŋecko ŋicwirec-nâŋec mocjaha Jesu Kristo e ŋic ekicnezi junâre-fârekac. 6 Eki hâcne juju-ticne qikiŋnehuc mâmâc sâko kiwiric-nâŋec rowec, irec biŋezi dameŋ-ticnao haŋ baocte. 7 No irec biŋe mumu â aposolo jupemurâ râecnukicne, erâ ŋic qâpuc dâŋ fâri qizecne â mamanasiŋte fuŋne jaza mutâc epemurâ qaqazu gie munarekicne. Dâŋ i burec mâcne, jâmbomac mukopac.

Ŋic â ŋokac jaŋere dâŋ

8 Ŋic jaŋere mukopac, jaŋe hae sâc aaric â maŋjahec tâmiric juhuc mejeŋic ɋaɋacne foha Anuturao sicnerâ numunšepieŋ. 9 Á ŋokac jaŋere mukopac, jaŋe ŋaqi aickerâ rojuhuc rume rume jupie izi eri-jeŋic ezejec, â qizec susuc-jeŋicko mâsi qâreŋ ee, me eri wiac furi sâko qoqonaŋ, me ŋaqi hohonebâcne ro juju ine mi enšepieŋ. 10 Ŋokac mitio juzo muŋgopieŋzi eehâmo gie bapie sâckeocmu. 11 Ŋokac jaŋe wahamicne juhuc niniŋkerâ hazec râehuc mamana gie banšepieŋ. 12 Ŋokaczi qaqazu gie baocte me ŋic qâhuc-jopaocte mi manacnekopac, e mâc rumerâ juzejec. 13 Adam e bâbâni bâfuakicne â Ewa ine šâhec. 14 Adam e eesaic rune mi manacnewec, ŋokaczi ine manacnerâ qaqatara bâfuawec. 15 Ŋokaczi motec roro-ticnere biaŋkeocmu, ine mamanasiŋhec â maŋjauŋhec erâ maŋɋaɋac juniŋmu ŋokac i jaŋe iŋuc hâcne eniŋmu.